ဘုရားကပေးတဲ့ ဆုလာဒ်ကို ပိုင်စိုးထားသူ မအေးသောင်းအတွက် ကဗျာ ၁
~~ မ အေးသောင်း ကို ချစ်တယ် ~~
ဤသို့
ချစ်ရပါသော မ အေးသောင်း ...။
ဘ၀မှာ
ကျွန်တော် အကြောက်ဆုံးက
မ အေးသောင်း ရဲ့ အလှကို
ကဗျာ ဖွဲ့ဆိုရမှာကိုပဲ....။
ဆေးစက်ကျရာ အရုပ်ထင်လည်း
မ အေးသောင်း ပုံတူကို
ပန်းချီဆရာတွေ လက်မှိုင်ချကြမှာ....
နတ်သမီးရုပ်တု ထုတဲ့
ပန်းပု ဆရာတွေလည်း
မ အေးသောင်း နဲ့ တွေ့ရင်
အငေးသား မိန်းမောနေရမှာ....။
ခေါင်းကလေးကို စောင်းငဲ့လိုက်တဲ့အခါ
နှုတ်ခမ်းလေး ဟ,ရုံ ပြုံးလိုက်တဲ့အခါ
မျက်လုံ်းလေး ပင့်ကြည့်လိုက်တဲ့အခါ...
ကမ္ဘာပေါ်က စက်ရုပ်တွေအားလုံး
အချစ်ကို နားလည်လာလိမ့်မယ်....။
ဥမ္မာဒန္တီကို ထားခဲ့တယ်....
သီတာဒေ၀ီကို ထားခဲ့တယ်....
ပပ၀တီကို ထားခဲ့တယ်....
မ အေးသောင်း သာ သမိုင်းတွင်ရမှာ
မ အေးသောင်း သာ ဂန္ထ၀င်တွင်ရမှာ
မ အေးသောင်း သာ ရာဇ၀င်တွင်ရမှာ....။
မ အေးသောင်း ဟာ
စမ်းချောင်းလေး ဖြစ်တယ်....
မ အေးသောင်း ဟာ
လမင်းလေး ဖြစ်တယ်....
မ အေးသောင်း ဟာ
ပန်းပွင့်လေး ဖြစ်တယ်....
ပြီးတော့ မ အေးသောင်း ဟာ
ကျွန်တော်ဖတ်လို့ မဆုံးတဲ့
ချစ်စရာ အကောင်းဆုံး
ဂန္ထ၀င် ကဗျာတပုဒ်လည်း ဖြစ်တယ်....။
မ အေးသောင်း ပြုံးတဲ့အခါ
ဓားတွေဟာ ကခုန်ကြလိမ့်မယ်...
မ အေးသောင်း သာ ရယ်လိုက်ရင်
မီးတွေဟာ ပန်းထ,ပွင့်မှာပဲ....
မ အေးသောင်း သာ မျက်ရည်ကျရင်တော့
တတိယ ကမ္ဘာစစ်ဟာ
ဗေဒင်မေးနေစရာ မလိုတော့ဘူး....။
ဒါပါပဲ...
မ အေးသောင်း ပျော်ရွှင်နေတဲ့အခါ
ပစ်ဖဲ တချပ်လိုမျိုး
ကျွန်တော့်ကို မေ့ထားပါ....
မ အေးသောင်း ၀မ်းနည်းနာကျင်လာတဲ့အခါ
ဟာသ တပုဒ်ဖတ်ရသလိုမျိုး
ကျွန်တော့်ကို သတိရပေးပါ....။
မ အေးသောင်း ရဲ့ အရွေ့ပေါ်မှာ
ကျွန်တော့ရဲ့ ဖြစ်တည်မှုတွေ ရှိတယ်....။ ။
#Kaung Credit>>>မအေးသောင်းpost မန့်မှ
No comments